شباط مان

كان حتى كان
فبلاد سميتها المغرب
واحد الإنسان
واقيلا نقول عفريت من عفاريت الزمان
بدا حياتو، بحالي وبحالك، مسكين، كحيان
قالوا والله أعلم كان سيكليس
وقالوا كان تكنسيان
وفواحد النهار، وبلا مقدمات
وحيت هو كان نقابي مان
قدر بوحدو والله أعلم ينوض الحايحة في فاس
فواحد النهار من أيام زمان
ومن بعد... غبر وما بقا بان لو أثر
حتى كان لي كان
وعاد ظهر صاحبنا شباط مان
وكأنوا المهدي المنتظر
حيث قالو لو بان وعليك الأمان
وهو رد التحية باحسن ما كان
قال ...
شبيك لبيك عفيريتك بين يديك
ومن داك زمان وفارسنا الهمام
يصول ويجول
ومن درجة لدرجة
أصبح أمين نقابة
ثم أمين عاااااااام ...
وفواحد النهار...
قالوا عقلو
راه المغرب ما غاديش مزيان
وأن حكومة بن كيران حكومة إخوان
والمغاربة يستحقوا حكومة
داااايزها الكلام
حكومة من نوع الميزان
حكومة واخا شحال وهي تحكم
المغاربة مازالين عوالين عليها
حيث هي اللي غادي تخرجنا من الازمة
وتفك الغمة وتحيد الظلمة وتكاد الميزان
واراه الميزان من الخيمة خرج مايل
هادي خمسين عام
واللي كان يوزن زاد الصروفة في كفة
وكفة ضرب باباها الزمان
شباط مان ياسادة قرر يخرج من الحكومة المعكازة
حكومة راس مالها هضرة
والهضرة ما تشري خضرة
وطلب من قوم الميزان
باش يصوتوا على الخروج من تحت حكام
عمي بن كيران
لكن... قبل تنفيد القرار الحكيم
شباط مان تلقى أوامر باش يتريث
حيت دخول الحكومة ماشي بحال خروجها
ومن داك نهار وهو يدور في مدن المغرب السعيد
ويقول كلام وكلام وكلام
حتى ظنينا أن حزب سيدي شباط
ولات سميتو حزب اللسان
هادي يا سامعين حكاية شباط مان
وحتى يبان البرهان
ونشوفو أش غادي يدير فارس الفرسان
واش غادي يبقى ولا غادي يسخى
خليتكوم فعناية الرحمن
وما تنساوش
هادي حلقة وحدة من حكايات شباط مان
والحكاية مازال ماسالات
حيث لكل قصة بداية ونهاية
والنهاية غادي تكون خير وسلام

******
يونس كحال