الجديدة حطو تذاكر ماتش الرجاء للبيع ومصدر "كود": منع جمهور الرجاء من حضور المباراة وارد

خلقت مباراة فريق الرجاء الرياضي والدفاع الحسني الجديدي بمدينة الجديدة اللي غادي تلعب غدا الثلاثاء، فالدورة 15 ديال الدوري الاحترافي، جدل جديد وهاد المرة بخصوص إمكانية حضور أو غياب جمهور الرجاء على الماتش.
إدارة الدفاع الحسني الجديدي حطات اليوم الاثنين تذاكر ماتش الفريق ضد الرجاء للبيع، وحددت مدة البيع ديالها فاليوم الاثنين، وأكدت أن الماتش غادي يتلعب بشبابيك مغلقة، وحددث أثمنة التيكي فمبلغ 30 درهم، و50 درهم و100 درهم، و500 درهم.
وبخصوص إمكانية حضور جمهور الرجاء من كازا إلى الجديدة باش بتفرج فالخضرا ضد الدفاع فالمواجهة اللي غادي تبدا الثلاثاء مع 8 ونص د الليل، أكد مصدر "كود" أن إمكانية منع جمهور الرجاء الرياضي من حضور ماتش الفريق ممكنة بزاف، وهادشي لأسباب تنظيمية ورجح السبب للأشغال اللي كيعرفها محيط تيران العبدي بالجديدة اللي غادي يحتضن الماتش.