شكون يربح اليوم المعركة؟ واش الغشاشة النقالة ولا وزارة التربية الوطنية باجراءتها الصارمة؟ حتى لدابا الوزارة خاسرة – تصاور

قبل ما يبدا الكتابي فمباراة توظيف الأطر النظامية للأكاديميات الجهوية للتربية والتكوين، وقبل ما يدخلو للمؤسسة كاع٬ كانت اجراءات تفتيش كبيرة. كيقلبو كلشي. فالدخلة للقسم٬ طلبو من الجميع يطح تلفونو. واخا هاكاك الغشاشة نجحو يرسلو لوراق ويلوحوها فالفايسبوك.
كاع للي عندو تلفونو كيف كتبين الصور اللي عند "كود"٬ حيدوه ليه. ولكن كاين اللي جايب اكثر من تلفون لمراكز الامتحانات اللي منتاشرة فمدن المغرب. راه 180 الف مرشح ومرشحة باش يختارو منهم 17 الف فاللخر.
دابا هاد الغشاشة لاحو الاسئلة ودابا كدور الاجوبة والغريب ان كثار كيهدر وما خايف من حتى شي حد. حاط تلفونو عادي. حسب مصادر ل"كود" كلشي اللي حصل واللي بان تلفونو وكان كيدوز غادي يطبق فيه القانون. هادو ما خاصهمش تطبيق القانون وما ينجحوهمش. خاص متابعة الغشاشة ومحاكمتهم باش هاد الظاهرة تقل.
راه يستحيل يكون اصلاح باساتذة غشاشة. سواء كان عمرو 30 او 50.