الدولة فخدمة "ملك الداخلة" السنوسي وشريكتو ليلى. كيفاش ما عندوش حساب بنكي وكيملك 6 اوطيلات وعندو 70 بالمائة واللي هدر معاه يجبد الاميرة

تصورو جوهرة المغرب الداخلة كلشي اللي كيتخدم فيها فالسياحة كيربح منو شخص واحد او جوج: ادريس السنوسي وشريكتو بنت اوعشي. ايلى كثرو الرحلات وبدعم من الدولة والجهة٬ اوطيلات هاد السيد اللي كيربح. ايلى دارت مشاريع وندوات ولقاءات دعم للصحرا: هاد الشخص اللي كيربح.
هاد السنوسي اللي كيقول ويعاود لكلشي: الشريفة قالت الشريفة قررات. مخبي ورا اميرة. اولا هاد الشي كذوب لان اللي كيهدر عليها ماشي اميرة وثانيا غير كيزيد فيه وصافي.
السنوسي كيملك 6 لوطيلات وداخل شريك ف3. يعني بعملية حسابية كيتحكم فاكثر من 60 بالمائة تقريبا من الطاقة الاستيعابية ديال فنادق المدينة.
كيف قلنا اللي دارتو وزارة السياحة والجهة لتنمية المدينة سياحيا هو للي كيستافد منو. هاداك الدعم اللي دارتو الجهة للنقل الجوي مثلا ربح منو بشكل كبير. الرحلات عارمات. طبعا هاد السنوسي مع كيخلع الناس ب"اميرتو" ما كيساهمش فانشطة عندها اشعاع دولي الا ايلى دخلات شريكتو فشي مشاريع فالتنظيم. كنهضرو على ليلى اوعشي.
كلشي خاشيين فيها شريطهم. شي بطولات ديال بعاني ديال ركوب الامواج. ديك الكذبة ديال "الصحراوية" وحتى انتاج كتاب دارو ولد هاد السنوسي. السيد طالع واكل، نازل واكل.
هاد السيد ما عندوش حساب بنكي فالمغرب حقاش مازال متابع من السلطات البنكية والضريبية على الاموال لي دا ليهم عن طريق شركات النسيج (الدجين) ديالو. وكايفتخر بان لا احد يستطيع ان يحرك المسطرة ضده.
طبعا ولدو عندو حسابات هنا وفاسبانيا.
واخا هاد الشي وحقاش عندو هاد لوطيلات٬ دار نشاط تخربيقة بين الفيدرالية الوطنية للسياحة وشي جورنال ديال السياحة وعطاو للسنوسي او لمجموعة السنوسي "الداخلة اتيتود" احسن فاعل فالجهة. التصطية وصافي.
الاخطر من هاد الشي هو ان ولاد التراب اي ولاد قبائل الداخلة ما كيستافدوش فالشغل من هاد الفنادق. حتى الانشطة ماشي ديال ولاد الدليم وغيرهم من قبائل الداخلة.