طاشرونات كيوجدو رؤساء المجالس. الطاشرون العلام بيت عندو فالفيرما منتخبون من بني يخلف اللي فيها الروينة

يتوقع ان يبث القضاء غدا فالصباح فقضية انتخابات جماعة بني يخلف ضواحي المحمدية. القضية مثيرة وغريبة. رجالات السلطة مورطين فيها. اخطاء مادية غدا يبث فيها القضاء دارت وفق تصريحات قيادات حزبية محلية. شي كيقول العامل اللي دارها وشي كيقول القايد اللي دارها.
اللي وقع هو ان القايد متهم باللي عطى صوت للاكبر سنا ضدا علي القانون. طبعا هاد الشي يحسم فيه القضاء غدا فالصباح. كما وقع ان وزعت دعوات لحضور الانتخابات لجوج اعضاء ما نجحوش. المجلس فيه 30 وتوزعات 32 دعوة.
دابا لحد الساعة مازال اعضاء التجمع الوطني للاحرار اللي قالو باللي ربحو٬ دايرين اعتصام فمقر الجماعة. كيتسناو القضاء غدا.
لكن وفق معطيات حصلت عليها "كود" فان طاشرونات معروفين منهم العلام اللي سبق وتعدى علي عدد من سكان اقامة "ايدين ايلدن" ببوزنيقة٬ داخل فهاد البيعة والشرية. فقد استضاف وفق مصادر "كود"٬ اعضاء من حزب الاستقلال فالفيرما ديالو.
هو وشي طاشرون اخر عينهم على بني يخلف. كيبان ليهم هوتة كبيرة تبيض ليهم الذهب. هاد الشي علاش كيوجدو المجالس.
هما اللي كيطلعو ويقادو المجالس. هاد الشي راه ماشي غير فبني يخلف. وقع فبلايص اخرى ومدن اخرى فالمغرب.