نجوى كوكوس اكبر مرشحة لقيادة لائحة لعيالات فجهة كازا. ظلمها الياس ونصفاتها المنصوري

رئيسة شبيبة حزب الاصالة والمعاصرة نجوى كوكوس قريبة بزاف من تكون وكيلة لائحة حزب الاصالة والمعاصرة فجهة الدار البيضاء سطات. وفق ما علمته "كود" فمازال ما تحسمش فاختيار وكيلات لوائح الحزب فالجهات 12 للمغرب ولكن كوكوس الاوفر حظ فجهة كازا.
باش يتجاوزو المحاباة وباك صاحبي والعلاقات المتداخلة اللي كانت زمن الياس العماري فانتخابات 2016 التشريعية تكونات لجنة فيها بالاضافة الى الامين العام عبد اللطيف وهبي رئيسة المجلس الوطني فاطمة الزهراء المنصوري ومحمد الحموتي رئيس اللجنة الوطنية للانتخابات بحزب الاصالة والمعاصرة وسمير كودار مدير الحملة الانتخابية للحزب.
كوكوس عندها كثار كيدافعو عليها. ظلمات ايام الياس العماري. همشها وقدم اللي بغى واخا كانت رئيسة الشبيبة. اليوم اختيارها تقريبا تحسم بقى غير الاعلان الرسمي. وكانت حملة تضامن كبيرة دارت معاها فالفايسبوك من قبل شباب وقيادات للتراكتور فكازا