الداخلية ماشي غير منعات الصحافيين.. ناسها كيضربوهم.. قايد فتيفلت ضرب صحافيي الامازيغية

تعرض صحافيو الأمازيغية، سعاد وصيف والمصور محمد بوالجيهال، لبارح الثلاثاء، للاعتداء بالضرب والسب والقدف، من طرف قائد الملحقة الثالثة بمدينة تيفلت. مشاو يديرو خدمتهم: روبورطاج على تزويد الأسواق بالمواد البلاستيكية فإقليم الخميسات الساعة القايد ضربهم.
وحسب توضيح للقناة الأمازيغية، القايد جا ولقاهم كيصورو وغوت عليهم بشكل هيستيري وبدا يخسر فالهضرة، وطلب منهم باش يوقفو التصوير على اعتبار أنه هو اللي كيعطي الترخيص فهذ المنطقة، قبل ما يصرفق الصحافية وصيف جوج مرات ويدفعها وهي حاملة فشهرها الثاني.
وقالت الصحافية وصيف بللي "تعرضها للضرب والاعتداء من طرف رجل سلطة باعتبارها مرا أولا, وصحافية ثانيا، كيكرس الحكَرة والاقصاء والتهميش الذي كتعرض ليه المرأة المغربية في شتى المجالات"، وأكدات بللي هذشي اللي وقع فعلا "يفوق التصور وصدمة لم استطع تجاوزها أو التعافي منها".
وحاول القايد والمقدمين اللي معاه يهرسو الكاميرا بداعي حجزها، الشيء اللي خلا المصور يتقاس بجروح، وخلاه يوقف عملة التصوير.