صفقة القرن. علاش خاصنا ندافعو على التمغرابيت وعلى تازة قبل غزة

المغرب الرسمي خدا موقف من صفقة القرن. شد لعصا من الوسط. اختيار كل واحد ودار ليه تقييم. جهة اعتبراتو تخاذل بحال القومجيين واليساريين الراديكاليين والاسلاميين بكاع اصنافهم. شي علانية بحال العدل والاحسان وشي بالتخبية بحال العدالة والتنمية. جهة اخرى اعتبرات موقف المغرب نقصاتو الجرأة. كان خاصو يبعد كاع على هاد الصراع ويديها فمشاكلو لكثيرة. هاد الشي عبرو عليه افراد بحال تصريح الناشط الامازيغي منير كجي ل”كود” البارح. هو كيدافع على تقارب مغربي اسرائيلي حقاش كاين المشترك معاهم عبر اليهود من اصول مغربية٬ اكثر من المشترك مع فلسطين.
الخارجية المغربية قالت باللي كتقدم جهود السلام التي تبذلها إدارة دونالد ترامب، وبررات هاد التقدير باللي من شان “صفقة القرن” تعطي دينامية بناءة للسلام. وباللي مع مبدأ حل فيه دولتين: فلسطين واسرائيل.
ولكن الخارجية فنفس الوقت قالت باللي “حل القضية هو مفتاح الاستقرار في الشرق الأوسط” وان هاد الشي خاصو "قبول الأطراف لهذه العناصر المختلفة أمر أساسي لتنفيذ هذه الخطة واستدامتها"، وباللي البعد الاقتصادي بوحدو ما كافيش.
وباللي خاص الحفاظ على وضع القدس باش كلشي يصلي فيه يهود ومسيح ومسلمين وباللي المغرب مع “حل واقعي وقابل للتطبيق ومنصف ودائم للقضية الفلسطينية، بما يلبي الحقوق المشروعة للشعب الفلسطيني، من أجل دولة مستقلة قابلة للحياة وذات سيادة، عاصمتها القدس الشرقية، وتمكن شعوب المنطقة من العيش بكرامة ورخاء واستقرار”.
المغرب شارك فمؤتمرات دارت على صفقة القرن منها مؤتمر البحرين. كان وفد من وزارة المالية ولكن كان الحضور المغربي لهاد القمة اللي اشرف عليها جاريد كوشنير كبير مستشاري الرئيس الامريكي دونالد ترامب وراجل بنتو ايفنكا اللي حتى هي مستشارة معاه.
المغرب الرسمي مازال حاصر راسو. اييه فلسطين عندها مكانة خاصة عند لمغاربة وكيعتابروها وحدين قضيتهم. عندها حضور قوي فوجدانهم وفنفس الوقت المغرب عندو قضية كتحدد سياستو الخارجية اللي هي الصحرا. شي تيارات اسلامية وقومجية ديما كتقدم فلسطين علي الصحرا. فعالم ترامب اللي كلشي فيه بيع وشرا خاص المغرب يكون واضح. ما يمكنش يكون عندو الزربة وفلوس الزبدة كيف كيقول المثل الفرنسي.
صفقة القرن دعماتها دول عربية. الدعم ما كانش تصريح واضح فكاع الحالات ولكن كاين دعم. ما يمكنش يكون المغرب اقوى من الامارات او حتى السعودية ويخرج ياخد مواقف كلفتها السياسية تقدر تكون كبيرة.
المغرب خاصو يديها اكثر فمشاكلو يلقى حلول للتعليم للقضاء للصحة لسوق الشغل. السياسة الخارجية مهمة ولكن زمن ترامب تقدر الكلفة ديالها تكون كبيرة. يقدر شي نهار يدير ليك تويت وحدة يضرب ليك كاع اللي خدمتي. من صالحنا نبقاو مركزين اكثر على تازة وديما نسبقوها على غزة.