مخزني فعمرو اكثر من سبعين عام طيح الروح نواحي تيزنيت

هاذ الايام الروح ولات ساهلة اكثر من القياس بمنطقة سوس، فبعد السيدة اللي ماتت بالضرب ف حصة ديال الرقية الشرعية و الاخ اللي قتل خوه بجنوية وسط دارهم، جات النوبة فإقليم تزنيت اللي وقعات فيه، مساء امس الاثنين، جريمة قتل كان بطلها هذه المرة مخزني متقاعد، ف عمرو اكثر من سبعين عام، وجّه طعنات قاتلة لواحد الشاب، ف سن الأحفاد ديالو، بدوار إفرادا التابع لجماعة أربعاء الساحل.
و حسب مصادر محلية، فإن الجاني الشيباني و الضحية الشاب كانوا تزايدو ف الهضرة قبل ما يتشادو بونية و ف الاخير جبد الشيباني جنوية ضرب بيها الخصم ديالو ف الصدر و الكرش.
الشيباني و بعدما شاف الضحية طايح ف الارض و الروح خرجات منو، ضرباتو الفيقة و عرف اشنو كايتسناه، عطاها بحبد و هرب من مسرح الجريمة، لكن هاذ الهربة ماغاديش تطول بزاف حيث تمكن الجدارمية بعدها بساعات من اعتقاله و وضعه تحت الحراسة النظرية، في الوقت اللي نقلو فيه جثة الضحية إلى مستودع الأموات بالمستشفى الإقليمي الحسن الأول بتزنيت لإخضاعها للتشريح اللي أمر بيه الوكيل العام باستئنافية اكادير.