ترامب وهو كيتسنا يتلاقى مع السيسي: فين هو دكتاتوري المفضل؟

غيثة علام – عن وول ستريت جورنال//
صحيفة “وول ستريت جورنال” قالت أن الرئيس المريكاني دونالد ترامب وصف الرئيس المصري عبد الفتاح السيسي ب”ديكتاتوره المفضل”، وهادشي فاش كان كيتسنى يتلاقى معاه على هامش قمة G7 اللي دارت ففرنسا الشهر اللي فات.
وحسب الصحيفة المريكانية، كان ترامب واقف كيتسنا اجتماع مع السيسي في “Hotel du Palais” بمدينة بيارتيس، صباح يوم 26 غشت، وسول “فين هو ديكتاتوري المفضل؟” بصوت عالي بما فيه الكفاية باش يسمعوه المسؤولين الأمريكيين والمصريين اللي كانو حاضرين.
وذكرت الصحيفة أنه مايمكنش نعرفو واش السيسي سمع ترامب فاش سول هاد السؤال، ورفض البيت الأبيض التعليق على الحدث، في حين قالت الصحيفة ماقدراتش تتاصل بالمسؤولين المصريين باش يعلقو.
واضافت الصحيفة بأن السيسي كيواجه بزاف ديال الانتقادات بسباب حكمه “التسلطي” ملي ولى رئيس في 2013، وحسب تقارير الأمم المتحدة ووزارة الخارجية الأمريكية وجماعات غير حكومية، اتهمت السلطات المصرية باحتجاز الآلاف من المعارضين السياسيين، وبتعذيب وقتل المحابسية وبإحباط المعارضة السياسية.