وبلاد مقلوبة سفاها على علاها. باش هبة تحرقات وهي حية ما حلوش فمهم يسبو البومبية ولا الدولة وباش متخلف من البي جي دي ومعلم معتوه كتب على بلجيكات دارو عريضة. وا سيطايل ورباعتها ماشي انتوما اللي تعطيو الدروس وفقيه فالدوار دار اللي ما تقدروش عليه

التصرف المتطرف اللي دارو برلماني البي جي دي علي العسري علي متطوعات بلجيكيات شابات فتارونانت واللي من بعد ندم معاه الحال ودار اعتذار شوية غبي ولكن اعتذار٬ ثم تدوينة داك المعلم الغبي اللي بغى يضحك بعبارات ماشي ديال الهزل الساعة هجرو وتم اعتقالوه ويستاحق٬ هاد التصرفات خلصات فيهم الدولة مزيان. صورة المغرب تهزات عند الرأي العام. عائلاتهم طلبات منهم يدخلو.
هاد الفعل اللي دارو البرلماني والمعلم حقير وخطير. الرد المناسب ليه هو اللي دارو فقيه الدوار. سواء قالو ليه يعرض عليهم وعرفتي اش نا هي يعرض عليه فقيه الدوار. او تصرف من مدايتو لراسو٬ المهم دار رد واعر. رد محترم. تلقائي طبيعي وفعال وقوي.
ولكن باش ينوضو رباعة فيهم مثقفين محترمين وفيهم مدعين عايشين غير بالريع ويديرو عريضة ويقولو باللي كيرفضو ويدينو شي حد يهدر باسم المغاربة٬ هنا كاين مشكل. حتى حد ما هدر باسم المغاربة ولمغاربة راه فيهم الداعشي وعلماني والسلفي والشيوعي والمؤمن واللي ما عندو ايمان حتى بشي حاجة…
ثانيا علاش فين ما تكون شي حاجة فيها العدالة والتنمية كينوض نور الدين عيوش وهاداك احمد غيات وسميرة سيطايل وكيتعبوهم وحدين خراين. اللي كيطرح مشكلة ان شي وحدين موقعين هاد العريضة ديال نلبسو شورط وديباردور تضامنا مع لبنات٬ محترمين بزاف. كيفاش تقولبو مع سيطايل وعيوش غيات هادا سؤال.
كاينين وكاينات فيهم حالات عايشين بالريع. عايشات بالريع. ريع المخزن. علاش كيحلو فمهم. ياخدو استقلالهم اولا. يخدمو على ريوسهم بعيد على الدولة. ياخدو المارشيات بدراعهم.
ثالثا. هاد العريضة كانت تكون فعالة لو نفس الاشخاص كانت عندهم الجرأة يتضامنو مع الطفلة هبة اللي تحرقات فسيدي علال البحراوي. كون بحثو يعرفو شحال الوقت باش وصلات البومبية وعلاش الما كان ضعيف وشكون المسؤول. ما يمكنش يسكتو فقضايا كبيرة. فاحداث كثيرة ويخرجو يهدرو فقضايا معينة.
خروج امثال سيطايل فقضايا معينة كيضعف كاع مبادراتهم. الانتقائية كتضرب كلشي فزيرو.