اعلنت وكالة الاخبار الجزائرية فواحد القصاصة ان مركز” جورج بومبيدو” احد اشهر المتاحف ف فرنسا غادي ينظم معرض صور خاص بالتعريف بما اسماه” كفاح الشعب الصحراوي” موقعة من طرف الناشط الفرنسي الامريكي جون لامور، ووخا قلبنا ف موقع المتحف على الانترنيت هاد الصباح مالقيناش أثر لهاد المعرض، واش تلغا؟ الله أعلم.. المهم ،الهدف من هاد المعرض حسب القصاصة دائما التعريف بالمقاومة ” الصحراوية” ولكن العجيب و “المقرف ” حسب وصف وكالة لاماب لهاد المعرض هو كونه فقط تجميع لصور حميمية و شخصية للجنود المغاربة اللي استشهدو ف خلال صد هجومات البوليساريو اثناء الحرب ف الثمانينات و التسعينات..صورهم الشخصية وصور أطفالهم وأسرهم.. الجزائر و البوليساريو فرحانين بهاد الانجاز، اي اقحام مؤسسة فنية معروفة فصراع سياسي خاصة انها محسوبة على المغرب سابقا مثل كَاع جميع النخبة الفرنسية الفنية اللي عندها اصدقاء ف المغرب وكايدوزو ايامات ف ف فندق المامونية.. المهم هاد الاختراق الجزايري جديد ولكن اللي نساو ان مثل هاد العمل غادي يجيب ليهم نتائج عكسية اذا خدم عليها المغرب مزيان..بحيث انه لاول مرة ف التاريخ الفني و التاريخ تستعمل صور حربية بشكل معكوس و بدون اذن مالكيها القانونين: الأسر و الورثة.. الصور اصلا اللي جمعتها ميليشيات البوليساريو من جثث شهداء الحرب قبل وقف إطلاق النار خصها ترجع عبر الصليب الاحمر للأسر، و اذا كَاع قلنا غادي تدير بها معرض ف خص يكون باذن هذه الاسر و اذن القوات المسلحة الملكية المغربية و الا سلمنا أنك بغيتي تدير معرض بدون إذن هاد الأسر ، فخص يكون موضوعه التعريف بويلات الحرب او موضوع انساني ماشي ” كفاح الشعب الصحراوي”..حيث فين كايبان هاد الكفاح فصور حميمية لجنود أغلبهم تم الغدر بهم ليلا فهجومات جبانة ديال حرب العصابات بأسلحة ليبية و كوبية و جزايرية .. البوليساريو بهاد المعرض غادي تبين وجهها الحقيقي ..فعكس ما تروج لراسها ف اوروبا فهي ليست حركة سلمية بحال حركة غاندي ولا مارتن كينغ ، راه حركة مسلحة و باعتراف المنظمات الحقوقية الدولية راه عندها جيش فيه الاطفال ونظام حزب واحد عندو سجون سرية و مارس التعذيب و الاختفاء القسري و عندها نظام اجتماعي دارتو ف المخيمات وخا يدعي التقدمية و الاشتراكية مزال قائم على القبلية و مزال عندهم العبودية حسب تقارير كل المنظمات الحقوقية العالمية..هي حركة انفصالية دارت جرائم حرب ضد الصحراويين اللاجئين و ضد الجنود و المدنيين المغاربة و الموريتانيين وماسلموش منها حتى صياديين اسبانيين و غيرهم.. هاد الخطوة البئيسة اللي دار هاد الفنان رد عليها المهدي قطبي رئيس متاحف المغرب و اللي عارف خبايا الاوساط الفنية الفرنسية ف رسالة حصلات عليها ” :”كَود” كايتنسكر هادشي وكيقول انها حركة صدمات الوسط الفني المغربي وكايقول انه لايري اي اضافة فنية لهكذا معرض.. وكايتمنى بلغة راقية ان مؤسسة بحال مركز بومبيدو يبعد على البروباغندا ولكن اللي خص يتدار بشكل عاجل هو ترفع دعوى قضائية من طرف الاسر ديال الشهداء و مصالح الجيش باش يتوقف هاد المعرض و ترجع الصور لمواليها و ثانيا الا ما توقفش يتم استغلال هاد المعرض بحد ذاتو باش تفضح البوليساريو – حيث خص يجاوبو على سؤال كيفاش حصلو على الصور وشكون قتل هادوك الناس وفين كايتجلى كفاهم ف صور اطفال جنود مغاربة؟- خص يبانو كونهم كايستغلو اي حاجة من اجل الدعاية وفقط . رسالة المهدي قطبي فيديو لجون لامار يحاول تبرير استغلال صور الشهداء :
