خاص.. الاستقلال شوّه راسو مني تراجع على الترشح لسباق رئاسة مجلس المستشارين.. دار بلاغ رسمي باش يدخل لغمار المنافسة وتراجع فآخر لحظة وها الموصيبة لكبيرة اللّي خاف منها

حزب الاستقلال شوّه راسو بيديه بعد تراجعه عن الترشح لسباق رئاسة مجلس المستشارين. اللجنة التنفيذية ديال الحزب كانت خرجات بواحد البلاغ رسمي كتعلن فيه أنها غادي تقدم مرشح باسم الحزب لهاد السابق دون الكشف عن إسم المرشح واللّي كان هو عبد الصمد قيوح حسب ما أكده مقرب من نزار بركة الأمين العامة ديال (الميزان) ل”كود”.
ووفق ما كشف عنه قيادي استقلالي، ل”كود”، فإن الحزب تصدم كولو مني اعرف وتأكد أن عدد من الأحزاب اللّي كانت كتدعم الاستقلال وتوقف معاه غادي تعاون حكيم بنشماش الأمين العام ديال البام، مضيفا بالقول: “كانت صدمة كبيرة وكان من الضروري نتراجعو على الترشح”.
وشرح المصدر الاستقلالي: “الاتتخابات ديال المستشارين اللّي قبل من هاد السباق اللي فيه غير حكيم تقدمنا حتى حنا وكان فرق ديال صوت واحد وهاد المرة الاستقلال بغا يحافظ على الصورة ديالو وميمكنش نقدمو مرشح ومنجيبو والو”.
وكشف القيادي الاستقلالي أن اللجنة التنفيذية مزال غادي دير اجتماعات خلال هاد الثلاث أيام باش تخرج بموقف رسمي وغادي تعلن فيه عدم ترشحها لهاد السباق. المهم دبا الاستقلال اعطا الكرة لحكيم بنشماش باش ياخد المجلس لولاية ثانية بلا منافس وبلا حارس.
المصيبة لكبيرة اللّي كانت غادي تضرب الاستقلاليات والاستقلاليين هي أن شي مستشارين من الاستقلال كانو باغيين يصوتو على حكيم بنشماش ضد فعبد الصمد قيوح اللّي كان مقدم باسم الميزان. إوا شفتو على مصيبة كيفاش دايرة.
يذكر أن حكيم بنشماش كان انتخب رئيس ديال مجلس المستشارين بحصوله على 58 صوتا، مقابل 57 صوتا لعبد الصمد قيوح مرشح حزب الاستقلال. أي كان فرق ديال صوت واحد بين البام والاستقلال المرة اللّي فاتت ودبا الاستقلال مارضاش يدخل لهاد السابق ويجيب شي نتيجة خايبة على هادي اللي كان جابها فأواخر سنة 2015.