مشرمل مغربي لاقاه زهرو مع مهاجرة رومانية فالطاليان راسها قاسح وجابها فراسو

عطات مهاجرة رومانية بمدينة “ميلانو” ، لمهاجر مغربي داكشي علاش كيقلب، بعدما غفلاتو بواحد النطحة قاسحة لوجهو، داخ من بعدها وبقات الدنيا كدور بيه، حتى تدخلات عناصر الأمن الإيطالي وشداتو .
وحسب موقع “ميلانو توداي” لي نشر الخبر، فإن مهاجر مغربي ، فعمرو 29 عام وعندو سوابق، كان حاول يكريسي مهاجرة رومانية فعمرها 55 عام ف”ميلانو”، إلا أن هاذ الأخيرة مكانتش ساهلة كيفما كان كيصحاب ليه، بحيت وهماتو أنها خايفة ورضخات بسهولة وبغات تعطيه داكشي لي كتملك ، وهي تغفلو بواحد النطحة طيحاتو كاو للأرض.
وبدا كيحاول بعدها يوقف وهو دايخ باش ياخد ليها داكشي ديالها بزز، لكن بعض المارة نقدوها وشلو الحركة ديالو حتى جاو عناصر الأمن وشدوه .