ها هما كيخورو ف"دوزيم" وهاداك كاري حنكو ديال برادة كيوجد فنزهة الصقلي. السيدة اللي دخلات للحكومة باسم حزبها بلا خبار القيادة والقناة واللي ورا القناة خدامين فالمخطط

هادي ايام استضاف حميد برادة الصحافي اللي كتجازيه الدولة على ما قدمه من خدمات ليها ايام كان ف"جون افريك" قبل ما يجري عليه مولاها بلا ما يحتج، استضاف البارح الاثنين في برنامجه "مي انكور" في "دوزيم" نزهة الصقلي اللي كانت وزيرة للمرأة. السيدة كيوجدوها لشي منصب ديال المناصفة واخا ما فيدهاش.
الصقلي عندها تخصص واحد هو فين ما وقع شي مشكل للتقدم والاشتراكية كتجي وكتعاير القيادة. كتعقلو نهار خرج بيان للديوان الملكي ردا على حوار نبيل بنعبد الله مع "الايام" وسمى بلا خوف الهمة ورا مشروع "البام" ناضت الرفيقة جات ل"دوزيم" للقيام بمهمة ما يمكنش لشي رفيق متشبع بفكر هاد الحزب يديرها. عودات نفس القضية البارح فالبرنامج ديال برادة.
السيدة ما كانش عندها الجرأة باش دافع على حزبها وتنتاقد هاد الزلزال كيف دار اسماعيل العلوي بل دافعت على الاعفاء ديال جوج من رفقها نبيل بنعبد الله والحسين الوردي. وعودات اسطوانة الحزب زاغ على منهجو وخاصو يرجع للسكة وانا ضد التحالف مع البي جي دي.
السيدة قدمها برادة كبديل واش هادو عاشو فالغرب كيعرفو الديموقراطية باش كيجيو عندنا كيوليو ديكتاتوريين. ما عندها شعبية ما عندها حضور وكيقول ليها كاي بليد واش تاخدي الحزب. قول قالو لي نقول ليك خودي الحزب وهنينا.
لسي برادة اللي تشهر بزاف نهار جاب ياسمينة بادو وكيدافع بطريقة غبية جدا علي الفاسة بدون ما ياخد المسافة جابها باش يقدمها انها الامينة العامة المقبلة للحزب. غباء واحد النوع ديال المخزن ما عندو حدود. السيدة بعدات من المكتب السياسي ما عندهاش شي دور
السي الفاهيم كنتي تسولها شكون اقترحها تكون وزيرة بلا خبار حزبها. هادا هو السؤال المهم. يعني هاداك اللي اقترحها تكون وزيرة هو اللي غادي يقتارحها للامانة العامة لحسن الحظ لبلاد تبدلات وحتى ايلى فكرو فيها المناضلين ديال الحزب ما يقبلوش هاد الشوهة