بونو ربح حمد الله فكلاسيكو السعودية بين الهلال والاتحاد

ربح الگول المغربي ياسين بونو اللاعب المغربي الاخر عبد الرزاق حمد الله فكلاسيكو الكورة السعودية، اللي تلعب اليوم الجمعة بين الهلال واتحاد جدة.
وسالا الماتش بين الهلال اللي كيحبس لهم ياسين بونو واتحاد جدة اللي كيلعب معهم عبد الرزاق حمد الله بنتيجة 3 لواحد لمصلحة الهلال، وساهم ياسين بونو فرباح الفريق ديالو بتصديات حاسمة، أما عبد الرزاق حمد الله ما كانش عندو الزهر فهاد الماتش وخصوصا وان اتحاد جدة غابو عليهم مجموعة من العناصر من بينهم النجم الفرنسي كريم بنزيما، وعتقهم الكول ديالهم عبد الله المعيوف من عدد ديال الاهداف حيث كانو يخسرو بأكثر من 3 لواحد.
الهلال بهاد الرباح خداو 3 بوان وهربو بصدارة بطولة السعودية برصيد 62 نقطة، على بعد 9 النقاط من اقرب المطاردين ديالو، اما اتحاد جدة فالفريق بقات عندو 37 نقطة وكيحتل المركز الخامس.