الشاف الشهير ايريك فريشون هو اللي غادي يشد ريسطو فروايال المنصور فكازا والماجيدي من اللولين اللي ذاقو شهيواتو

بدا الشاف الشهير واحد الطباخة لكبار ففرانسا ايريك فريشون كيوجد لاكارط ديال ريسطو روايال المنصور فالدار البيضاء. حسب ما عملته "كود" فهاد الشاف الشهير اللي عندو 3 نجمات ديال ميشلين والشاف ديال الريسطو المعروفة "ايبيكور" باوطيل بريسطول الباريسي٬ ختار الفرقة ديالو وفيها مغاربة واجانب. التكوين ديالهم بعد اختيارهم كان فروايال المنصور ديال مراكش حسب مصادر "كود".
دابا هاد الشاف كيوجد بشكل يومي اطباقو وكيجرب اخرى. شخصيات كثيرة خاصة من مجموعة "المدى" جات وذاقت هاد الشي. منهم مدير الكتابة الخاصة للملك محمد منير الماجيدي اللي مكلف بتتبع اشغال هاد لوطيل اللي تعطل وتعاودات فيه شحال من حاجة.
روايال المنصور اللي كاين فشارع الجيش الملكي فكازا غادي يكون فنفس مستوى روايال المنصور ديال مراكش واخا ديال كازا هو الاصل
لحد الان حتى حد ما عارف بالضبط وقتاش الافتتاح الرسمي للوطيل ومعاه الريسطو. هاد الشي غادي يكون ف2024 ولكن اش من شهر؟ ما تسربات حتى شي معلومة