صراع كبير على كرسي نقيب محامي الرباط.. 4 د لمرشحين كيتنافسو عليه والدور الثاني مرجح يحسم بين هاد الجوج

علمت "كود" من مصدر بهيئة المحامين بالرباط، بأن الصراع على منصب النقيب بات واضحا بين 4 مرشحين، ولكن "جوج منهم فقط باينين غايدوزو للدور الثاني".
الانتخابات ديال نقيب المحامين بالعاصمة غايكون نهار 21/22 دجنبر الجاري، فيها الدور الأول والثاني، والمرشحين هم: التهامي الوزاني، محمد شماعو، عبد الكريم الميساوي، عزيز رويبح.
التهامي الوزاني معروف محامي الدولة، محامي ديال وزارات وبعض مؤسسات الدولة، من أبرز المرشحين، فالمقابل كاين محامي مدعوم كذلك من القاعدة وهو مناضل يساري، وكيتعلق الأمر بعزيز رويبح، مرشح للتنافس على المنصب.
فيما كيبقاو المرشحين الآخرين، كذلك عندهم حظوظ ولكن ماشي فهاد المرحلة، حسب مصدر "كود"، خصوصا المحامي شماعو اللي من أبرز المناضلين واللي بانو فمعركة المحامين ضد وزارة العدل سواء فيما يتعلق بقانون المهنة أو الضريبة الجديدة المفروضة على قطاع المحامين.
يشار بلي الرويبح كان منافس بقوة في الجمع العام السابق للهيئة، واللي انتخب فيه عبد الله عدنان المقرب من نزار بركة الأمين لحزب الاستقلال.