بسباب الصهد وموت معجبة ديالها بين الجمهور.. تايلور سويفت أجلات حفلة ديالها

أجلات المغنية الميريكانية المشهورة تايلور سويفت الحفلة لي كانت غادي تدير السبت لي فات حتى الاثنين، بسباب الصهد الكبير لي كاين في البرازيل والموت ديال واحد المعجبة بيها في الحفلة لي دارت ف النهار لي قبل.
ونهار الجمعة، وصلات الحراراة في ريو ديجانيرو ل59 درجة، وهو لي تسبب فالموت ديال واحد البنت عندها 23 عام كانت من الجمهور لي حضر الحفلة ديالها وسط 60 ألف واحد في العرض الأول من جولة "إيراس تور" في البرازيل.
سويفت كتبات ستاتو قالت فيه "أنا كنكتب من الفيستيير فالتيران، راني قررت نأجل العرض ديال هاد الليلة بسباب الصهد لي كاين في ريو ديجانيرو".
وزادت قالت: "سلامة الحضور والفنانين صحابي والكروب دالخدمة هي لي خاصها تكون الأولى". ومن بعد قررو يأجلو الحفلة حتى لنهار الاثنين.
السلطات الصحية في ريو ديجانيرو، علنات أن واحد البنت سميتها آنا بينيفيدس ماتت لعشية د الجمعة بعدما جاتها سكتة قلبية تنفسية في ملعب نيلتون سانتوس وهي حاضرة لحفلة سويفت.