زعترة الحياة العامة. مول القرد ومول البارود وعبيد والطبيب وجبارة ..نماذج دارها ابو زعيتر. كينتاحلو صفة وكيفرضوهم شي عفاريت وحتى حد ما يحاسب جد باباهم

غاديين بشوية كنزعترو الحياة العامة فالمغرب. غاديين ناخدو نموذج ابو زعيتر فاكثر من قطاع. الزعترة كاينة دابا ف"دوزيم". هاد القناة جابت سعد عبيد وشي طبيب وشي ممثلة وشي فكاهية ورسلاتهم مع مدير التسويق ف"دوزيم" وشي كمامر خراين باش يديرو شي تفاهة اسمها "الفرقة". هاد لكمامر اللي نتاحلو صفة صحافي وممكن ياخدو شي 300 مليون على تفاهتهم٬ كيديرو خدمة ماشي ديالهم. ما كاينش اللي غادي يحاسبهم.
هادو نموذج لابو زعيتر. شي خوت ما عرف حتى مغربي منين جاو حتى ولاو مستثمرين كيديرو عمل الحكومة كاع بحال ما دار شي تافه منهم نهار مشى لمستشفى بن سينا الجامعي وحيح على الادارة. نفس التصرف تكرر فطنجة.
دابا هاد النموذج انتقل للصحافة من خلال اعتماد مول القرد فمونديال الفيفا للسيدات اللي كاينة فاستراليا ومن خلال اعتماد حسن بركة باسم "العلم" باش يدير كبسولات ل"الرياضية" واخا هو ما عندو علاقة بالصحافة. وصل كذلك لهادوك الفرقة كيف قلنا.
الزعترة كاينة فالبيزنس كذلك، شفنا كيفاش هاداك جواد اليوسفي مول البارود غير قدم شكاية شدو مسؤول فالمدرسة الامريكية. شهادة طبيب نفساني لولدو كانت كافية يتشد هاد المسؤول وتخلق ازمة ديبلوماسية مع ميريكان.
مول البارود بحال بوزعيتر خلع كلشي ودخلو السيد لعكاشة بلا ما يطبقو لا القانون ولا يخافو من تبعات قرار غبي بحال هادا على العلاقة بين الدولتين.
بلادنا فدستورها الجديد وعدات باش تقطع مع هاد الممارسات. بلاد ما خاصش يكونو فيها نماذج الزعيترات. غير للي بان بعد 12 عام من هاداك الدستور٬ الزعترة ولات قدوة عند شي تافهين. كلشي باغي يكون بحال بوزعيتر.
المسؤولية الاولى للدولة. هي اللي مخلية هاد النوع. كاينة مسؤولية المجتمع. خاصو يخلق جبهة ضد هاد العينة. راها كتهدد لبلاد.