المنتخب المغربي تأهل لأولمبياد باريس بعدما ربح مالي فدومي فينال كأس إفريقيا U23 وغيلعب النهائي مع مصر

تأهل المنتخب الوطني المغربي للألعاب الأولمبية للمرة الثامنة فالتاريخ ديالو، وضمن المشاركة فأولمبياد "باريس 2024′′، بعدما ربح اليوم الثلاثاء فتيران مولاي عبد الله بالرباط، منتخب مالي فدومي فينال كوب دافريك U23 بالبلانتيات، وتأهل أيضا لفينال الأخير.
وسالا الماتش بين المنتخب المغربي ومنتخب مالي بنتيجة جوج مقابل جوج، وكان المنتخب المغربي هو اللي ماركا الأول بهدف من توقيع زكرياء وحيدي فالدقيقة 14، وفالشوط الثاني نجح منتخب مالي وجاب التعادل بواسطة مامادي ديامبو فالدقيقة 65، وبقات النتيجة متعادلة حتى سالا الوقت الأصلي من المباراة واحد لواحد.
ومشاو المنتخبين المغربي والمالي بعدها للشوطين الإضافيين، وقدر المنتخب المغربي يماركي الهدف الثاني فالدقيقة 108 بواسطة أمين الوزاني، ولكن نجح بعدها المنتخب المالي مرة أخرى، وجاب التعادل عن طريق يوسوفي مايكا فالدقيقة 116، ومشاو المنتخبان بجوج لضربات الترجيح اللي عطات الرباح للمنتخب المغربي بنتجية 4 مقابل 3 للماليين.
وبهذا كيكون المنتخب الوطني المغربي ضمن التأهل إلى أولمبياد باريس 2024، وهي ثامن مرة كيشارك فيها المغرب بمنتخب ديال كرة القدم، وآخر مرة اللي كانت فدورة لندن 2018، ودابا الأشبال غيركزو على لقب كأس إفريقيا لأقل من 23 عام، واللي غيلعبو فالفينال ديالو مع منتخب مصر حامل اللقب، والنهائي غيتلعب السبت الجاي فتيران مولاي عبد الله بالرباط.