كيواصل الوداد الرياضي الاستعدادات ديالو لروتور فينال عصبة أبطال إفريقيا، اللي غيلعبو ضد الأهلي المصري الأحد الجاي بستاد دونور بكازا. الوداد الرياضي كيدير دابا حصة تدريبة جديدة بمركز محمد السادس لكرة القدم بالمعمورة تحت إشراف المدرب زفين فاندنبروك، والأجواء داخل الفريق زوينة بزاف حسب ما عاينو موقع "كود"، اللاعبين ناشطين ومركزين والمورال عندهم طالع وكاين الحماس وسط لكروب. وبالنسبة للاعبين اللي حضرو الحصة التدريبية هذه العشية، فكل العناصر كاينين فالحصة التدريبية باستثناء زهير المترجي اللي تاكد الغياب ديالو على ماتش روتور فينال عصبة أبطال إفريقيا حسب ما قال المدرب زفين فاندنبروك بسبب الإصابة فماتش الذهاب بالقاهرة، وكذلك عبد الله حيمود اللي دار عملية جراحية حيد بها المصران الزيدة ملي كان بمصر مع الفريق وكان غاب حتى على ماتش الذهاب.
